Kigali, 02/02/2022: Umunyamabanga wa Leta Ushinzwe Amashuri Abanza n'Ayisumbuye Nyakubahwa Gaspard TWAGIRAYEZU yatangije ukwezi k'umuco mu mashuri ku rwego rw'igihugu. Ibizakorwa muri uku kwezi byose bizagendera ku nsanganyamatsiko igira iti: “Umuco dusangiye uraturanga,ururimi rwacu rukaduhuza”. Iki gikorwa cyabereye mu ishuri rya  Lycée Notre Dame de Citeaux riherereye mu Karere ka Nyarugenge , mu mujyi wa Kigali, ariko ibikorwa nk'ibi bikaba byanabereye mu Ntara zose zigize u Rwanda ahatangijwe ibikorwa bitandukanye byateguriwe abanyeshuri biga mu mashuri y’incuke, abanza n'ayisumbuye.

Mu ijambo yagejeje ku bitabiriye iki gikorwa, Umunyamabanga wa Leta yagize ati: ''Tugamije ko iki gikorwa cy’ukwezi k’umuco mu mashuri kiba igikorwa ngarukamwaka . Twiyemeje kwigisha no gutoza umuco mu mashuri yose kugirango abana b’u Rwanda bamenye, banasobanukirwe umuco nyarwanda bakwiye kubakiraho.

Nyakubahwa Twagirayezu yashimangiye ko ubumenyi bwose abanyeshuri bahabwa mu ishuri bufata ku ndangagaciro na kirazira,  Bityo ko uku kwezi k’umuco buri shuri rizateganya gahunda yo gutoza umuco; abanyeshuri bazigishwa kandi indangagaciro fatizo uko ari enye : gukunda igihugu, ubumwe, ubupfura n'umurimo