Kigali, kuri uyu wa Gatatu tariki ya 26 Mata 2023, MINEDUC n'Ibigo biyishamikiyeho bibutse abari abakozi ba Minisiteri y'Amashuri Abanza n'Ayisumbuye (MINPRISEC), Minisiteri y'Amashuri Makuru, Ubushakashatsi n'Umuco (MINESUPRES) n’Ibigo byari bishamikiye kuri izo Minisiteri bazize Jenoside yakorewe Abatutsi mu 1994.

Ni umuhango wabanjirijwe no kunamira abakozi b'izo Minisiteri n'Ibigo 77 bishwe muri Jenoside yakorewe Abatutsi mu 1994 ku Rwibutso rwa Minisiteri y'Uburezi ukomereza ku Rwibutso rwa Jenoside rwa Kigali aho abitabiriye basuye u Rwibutso, bashyira indabo ahashyinguye imibiri y'abazize Jenoside yakorewe abatutsi irenga ibihumbi 250. Hakuriyeho ibiganiro kuri Jenoside, ubuhamya, indindirimbo n’ubutumwa mu mbwirwaruhamwe z'Abayobozi batandukanye.

Mu butumwa yagejeje ku bitabiriye uyu muhango Minisitiri w'Uburezi Dr. Valentine Uwamariya yihanganishije imiryango y’abakozi 77 bakoraga muri Minisiteri y’Uburezi n’Ibigo biyishamikiyeho bazize Jenoside anagaragaza uko imiyoborere mibi yaranze u Rwanda yagize ingaruka mbi ku mibanire y’Abanyarwanda kugeza kuri Jenoside yakorewe Abatutsi.

Dr Uwamariya: imiyoborere yaranze u Rwanda mu bihe bitandukanye by’amateka yimakaje amacakubiri, ashingiye ku ihezwa, irondabwoko n’irondakarere, akazu n’icyenewabo byagize ingaruka mbi ku mibanire y’Abanyarwanda. Ibi nibyo byagejeje igihugu kuri Jenoside yakorewe Abatutsi 1994.

Dr. Uwamariya yavuze kandi ko amateka yigishijwe mu mashuri akanamamara mu mu nyandiko no mu mbwirwaruhame zinyuranye yari amateka agoramye yifashishijwe mu kwimakaza politiki n´inyigisho z´ikinyoma zabanjirije Jenoside yakorewe Abatutsi. Abize n´abanditsi b´amateka b´iki gihe rero bafite umukoro ukomeye wo gushingira ku bimaze kugerwa n´ubushakashatsi bwa vuba aha, bakandika amateka y´ukuri ku byabaye.

Hon. Dr. Uwamariya Valentine, Minisitiri w'Uburezi

Dr Uwamariya: abarezi, ababyeyi n'Abanyarwanda muri rusange dufite uruhare mu kwigisha abana b’u Rwanda kwitandukanya burundu n’ingengabitekerezo ya Jenoside, bagasobanurirwa impamvu yo Kwibuka no guha icyubahiro abazize Jenoside yakorewe Abatutsi bakanamenya amateka y´u Rwanda.

Dr Uwamariya yongeyeho ko ibi byose twize mu mateka yacu, ni ibikomeza ubumwe bwacu, birimo agaciro k’ubuyobozi bwiza bwita ku mibereho y’abenegihugu. Nk’Umuryango mugari w’uburezi rero, dukomeze gutanga umusanzu wacu mu rugendo rwo kwiyubaka no guteza imbere igihugu cyacu.

Mu butumwa yagejeje ku bitabiriye uyu muhango, Umunyamabanga wa Leta ushinzwe amashuri Abanza n’Ayisumbuye Gaspard Twagirayezu yavuze Uburezi buri ku isonga mu byifashishijwe mu gukwirakwiza ingengabitekerezo ya Jenoside yakorewe Abatutsi 1994.

Hon. Twagirayezu Gaspard, Umunyamabanga wa Leta ushinzwe Amashuri Abanza n'Ayisumbuye

Hon. Twagirayezu yagize at: "mu 1973 hirukanwe Abatutsi mu mashuri yose yisumbuye na Kaminuza Nkuru y’u Rwanda harimo n’amashuri yayoborwaga n’abanyamadini, bamwe muri bo banashyigikiye iyo politiki bagira uruhare mu bwicanyi.

Hon. Twagirayezu yongeye ati: "turibuka, twiyubaka kandi dukomeza kwifatanya n’imiryango y’ababuze ababo muri Jenoside yakorewe Abatutsi mu 1994. Turasabwa kubaba hafi no kwimakaza umuco w’amahoro, kwamaganira kure ibikorwa byose n’amagambo yose agaragaramo ingengabitekerezo ya jenoside."

Canon Kayitaba Michel uwatanze ubuhamya.

Mu buhamya bwe, Canon Kayitaba Michel yagaragaje uburyo Abatutsi bagiye batotezwa kuva kera, bakanabuzwa uburenganzira mu nzego zitandukanye cyane cyane mu burezi kuko yahuye nabyo kuva ari umunyeshuri kugeza anabaye umwarimu. Yanagaragaje kandi inzira y’umusaraba yanyuzemo kugira ngo arokoke Jenoside yakorewe Abatutsi.

Jean Claude Rukemampunzi Uhagarariye Umuryango IBUKA

Uhagarariye Umuryango IBUKA Jean Claude Rukemampunzi yashimiye Minisiteri y’Uburezi ku bw’iki gikorwa cyo kwibuka ndetse anasaba ko n’ibigo by’amashuri nabyo byajya bigira umwanya wihariye wo kwibuka mu rwego rwo gukomeza gukangurira urubyiruko kuva mu mateka mabi ahubwo amateka meza kugira ngo ibyabaye bitazongera kuba ukundi.

Uyu muhango kandi witabiriwe n’Umuhanzi Mariya Yohana watanze ubumwa bwo kwibuka mu ndirimbo.

Andi mafoto yaranze igikorwa.